Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 6, 31. maj 2001-imeersoq.
(Amigartoorutit ukiuni tulliuttuni ilanngaatigineqarsinnaanerisa killiliivigineqarnerat kiisalu iluanaarutisiatut isigineqartut annertusineqarnerat)

 

§ 1.

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, kingullermik Inatsisartut inatsisaatigut nr. 9, 11. november 2000-imeersukkut allanngortinneqartumi makku allannguutigitinneqarput:

1. § 21 a-p kingornanut ilanngunneqassaaq:
"§ 21 b. Aningaasarsiat akileraaruteqaataasussat naatsorsorneqartut, ukiumi aningaasarsiorfiusumi naatsorsuutitigut nalikilliiliissutaasunit annertunerusunik tamakkiisumik ilaannakortumilluunniit akileraarutitigut nalikilliliinernik pissuteqartumik amigartoorutaappata, taava amigartoorutit naatsorsorneqartut ilaat taakku ukiuni aningaasarsiorfiusuni tulliuttuni aningaasarsianit akileraaruteqaataasussanit ilanngaatigineqarsinnaanngillat.
Imm. 2. Akileraarutitigut nalikilliliissutit imm. 1-imi taaneqartut utertinneqarnissaat qinnuteqartoqarneratigut Skatterådimit akuersissutigineqarsinnaavoq."

2. § 70, imm. 2 ima oqaasertaqassaaq:
"Imm. 2. Iluanaarutisiatut isigineqarput suulluunniit aktiaatilinnut pisassaritinneqartut tamaasa, taamaallaat aktiat akilersinnagit aktiaatilinnut tunniunneqartut aamma akiliisinnaajunnaarnermi pigisat aningaasanngortitaaneranni iluanaarutit pinnagit. Pissutsit taakku aamma atuupput anpartinik piginnittunik iluanaarutisisitsinermi."

3. § 81, imm. 1, oqaaseqatigiit siulliit ima oqaasertaqassapput:
"Akileraarutit piffissaagallartillugu akilerneqarsimanngippata kommunip pineqartup imaluunniit Akileraartarnermi Pisortaqarfiup akileraartussaatitap unerartitsisussaatitalluunniit Kalaallit Nunaanni sulisitsisua allaffigalugu peqqusinnaavaa atorfeqartup kiffartuussinermini aningaasanngorlugit akissarsiaasa ilaannik aningaasat amigaataasut tapiissutinik, ernianik immikkullu akiliutissanik ilallit matuneqarnissaannut naammattunik unerartitsillunilu unerartitanik kommunimut pineqartumut imaluunniit Akileraartarnermi Pisortaqarfimmut akiliuteqaqqullugu."

 

§ 2.

Inatsisartut inatsisaat 1. juni 2001-imiit atuutilissaaq.
Imm. 2. § 1, nr. 1 ukioq aningaasarsiorfiusoq 2000 aallarnerfigalugu atortuulissaaq.
Imm. 3. § 1, nr. 2 inatsisissatut siunnersuutip saqqummiunneqarneraniit atortuulissaaq*. Skatterådip akuersissuteqarneratigut aalajangersagaq saneqqunneqarsinnaavoq.

Namminersornerullutik Oqartussat, ulloq 31. maj 2001

Jonathan Motzfeldt

/

Josef Motzfeldt

 

*Inatsisissatut siunnersuut saqqummiunneqarpoq siullermeerlugulu oqaluuserineqarluni ullormi 7. maj 2001-imi, taamaasilluni § 1, nr. 2 ullormit tassanngaaniit atuutilersinneqarluni, takuuk § 2, imm. 3.